من طالب و متخرج جامعي إلى إرهابي كيف ذلك ؟؟
تعرفو أش معناها جفاف المنابع الدينية ؟
معناها انو شبابنا توة ما يعرفش دينو جاهل بقواعدو أي نعم ديننا دين الإسلام دين التسامح و الأخوة و التعايش السلمي مع جميع الطوائف و الديانات و الملل .. ما يعرفش أش معناها ادفع السيئة بالحسنة تمحوها , ما يعرفش أحب لأخيك ما تحب لنفسك , ما يعرفش لا إكراه في الدين , ما يعرفش سيرة أعظم رجل في الدنيا سيدنا محمد عليه أفضل الصلاة و السلام كيفاش عاش و كيفاش تعامل مع اليهود و النصارى كانو جيرانو و يحسن إليهم ... ما يعرفوش صحابة رسول الله كيفاش عاشو و كيفاش خدمو الأمة هاذي و أسسو أعظم دولة في تاريخ البشرية يعيشو فيها الناس بكل بسلام و أمان.
تعرفو آش معناها تجفيف منابع الاسلام ؟
معناها شباب كيما كنا نحكيو عليهم شباب طيب باهي عاقل تحسو قريب الى الله و يحب الرسول يعطي في حق ربي عادي يجيو ها الجماعة المتطرفين يدورو بيه يبداو يعبيولو في موخو بالآيات الموضوعة في خارج إطارها و يؤولوها كيما يحبو هوما و الأحاديث الخارجة عن سياقها و يفسروها كيما يخطرلهم هوما و سعات أحاديث مكذوبة , و تلقى هاك الشباب المسكين الجاهل بدينه ماشي معاهم في الخط سبهلالا ... هيه بعد ما بين 6 شهور و عام من غسيل المخ تلقى مخلوق جديد نوع أخر فصيلة أخرى مبرمج آلة قتل فتاكة أعمى البصيرة ينفذ ما يطلب منه بدون تردد مع شوية حرابش تنزع الخوف ها كهو يصير الي يصير و ما ينجم يوقفو حد !!!!!!
هذا بكل بسب تجاهل الدولة لهذه النقطة و رضوخها للبرامج التعليمية المسقطة علينا من الدول الأجنبية... فخلاصة القول الدولة الممثلة حاليا في الكفاءات إلي تسير في 4 دول فهمتي و الا لا عليها أن تنتبه لهذه النقطة و تعالجها في أسرع وقت حتى لا ننتج أجيال و أجيال أخرى تحمل في طياتها شباب متخرج و جامعي و مع ذلك يمكن أن يكون إرهابيا !!!!!!!!!!!!!!
و في الختام فما مقولة أعجبتني تنقد كيفية تعامل و تشخيص الدولة لمصيبة الإرهاب و سامحوني في الكلمة قالك "مقاومة الإرهاب في تونس عبارة علي واحد مريض بالسرطان ويدهن في قفاه بالفيكس" .
محمد ماهر بوحولة
0 التعليقات
